Pifagor falsafasida son barcha narsaning mohiyati, olam esa sonlar va ular orasidagi munosabatlarning garmonik sistemasi, degan g’oyani ilgari surgan. Matematika tarixida Pifagor geometriyaga sistematik isbot tushunchasini kiritib, uni abstrakt fan darajasiga ko’targan. To’g’ri chiziqli shakllar geometriyasini tuzgan, o’xshashlik haqidagi ta’limotni yaratgan, to’g’ri burchakli uchburchak haqidagi teoremani isbotlagan. Ayrim muntazam ko’pburchak va ko’pyoqliklarni yasagan. Juft va toq, tub va murakkab sonlar, mukammal sonlar, arifmetik,geometrik, garmonik proporsiyalar Pifagor nomi bilan bog’liq.Pifagorni otasi Mnesarx xizmat safariga doimo o’zi bilan birga olib yurgan. Natijada Pifagor qiziquvchan va intiluvchan bo’lib o’sgan. U faylasuflar Anaksimandr va Ferekidning shogirdi bo’lgan. Uzoq vaqt Misrda tahsil olgan. Zardushtiylik dinlariga juda qiziqqan. Rivoyatlarga qaraganda, Pifagor hech qachon yig’lamagan va umuman ehtiros, his-hayajonga berilmagan. Pifagor hayotning mazmuniga oid qarashlarga “falsafa” deb nom bergan birinchi donishmand edi.